DOMINICA XVIII “ PER ANNUM ”

Ant. ad introitum Ps 69, 2.6

Deus, in adiutórium meum inténde;

Dómine, ad adiuvándum me festína.

Adiútor meus et liberátor meus es tu;

Dómine, ne moréris.

Collecta

Adésto, Dómine, fámulis tuis,

et perpétuam benignitátem largíre poscéntibus,

ut his, qui te auctórem et gubernatórem gloriántur habére,

et creáta restáures, et restauráta consérves.

Per Dóminum.

Super oblata

Propítius, Dómine, quǽsumus, hæc dona sanctífica,

et, hóstiæ spiritális oblatióne suscépta,

nosmetípsos tibi pérfice munus ætérnum.

Per Christum.

Ant. ad communionem Sap 16, 20

Panem de cælo dedísti nobis, Dómine,

habéntem omne delectaméntum,

et omnem sapórem suavitátis.

Vel: Io 6, 35

Ego sum panis vitæ, dicit Dóminus.

Qui venit ad me non esúriet, et qui credit in me non sítiet.

Post communionem

Quos cælésti récreas múnere,

perpétuo, Dómine, comitáre præsídio,

et, quos fovére non désinis,

dignos fíeri sempitérna redemptióne concéde.

Per Christum.