Feria quarta

Ant. ad introitum Cf. Hab 2, 3; 1 Cor 4, 5

Véniet Dóminus et non tardábit,

et illuminábit abscóndita tenebrárum,

et manifestábit se ad omnes gentes.

Collecta

Præsta, quǽsumus, omnípotens Deus,

ut Fílii tui ventúra sollémnitas

et præséntis nobis vitæ remédia largiátur,

et prǽmia ætérna concédat.

Per Dóminum.

Super oblata

Devotiónis nostræ tibi, Dómine, quǽsumus,

hóstia iúgiter immolétur,

quæ et sacri péragat institúta mystérii,

et salutáre tuum nobis poténter operétur.

Per Christum.

Præfatio I de Adventu, p. 518.

Ant. ad communionem Cf. Is 40, 10; 35, 5

Ecce Dóminus noster cum virtúte véniet,

ut illúminet óculos servórum suórum.

Post communionem

Tuam, Dómine, cleméntiam implorámus,

ut hæc divína subsídia, a vítiis expiátos,

ad festa ventúra nos prǽparent.

Per Christum.