Main Menu

Użytkowników:
1
Artykułów:
1898
Odsłon artykułów:
10661152

Odwiedza nas 256 gości oraz 0 użytkowników.

PREX EUCHARISTICA II

Ocena użytkowników: 4 / 5

Gwiazdka aktywnaGwiazdka aktywnaGwiazdka aktywnaGwiazdka aktywnaGwiazdka nieaktywna
 

PREX EUCHARISTICA II

99. Quamvis præfatione propria instructa sit, Prex eucharistica hæc adhiberi potest etiam cum aliis præfationibus, cum iis præsertim quæ mysterium salutis compendiose repræsentant, v. gr. Cum præfationibus communibus.

V. Dóminus vobíscum.

R. Et cum spíritu tuo.

V. Sursum corda.

R. Habémus ad Dóminum.

V. Grátias agámus Dómino Deo nostro.

R. Dignum et iustum est.

Vere dignum et iustum est, æquum et salutáre,

nos tibi, sancte Pater,

semper et ubíque grátias ágere

per Fílium dilectiónis tuæ Iesum Christum,

Verbum tuum per quod cuncta fecísti:

quem misísti nobis Salvatórem et Redemptórem,

incarnátum de Spíritu Sancto et ex Vírgine natum.

Qui voluntátem tuam adímplens

et pópulum tibi sanctum acquírens

exténdit manus cum paterétur,

ut mortem sólveret et resurrectiónem manifestáret.

Et ídeo cum Angelis et ómnibus Sanctis

glóriam tuam prædicámus, una voce dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

100. Sacerdos, manibus extensis, dicit:

Vere Sanctus es, Dómine, fons omnis sanctitátis.

101. Iungit manus, easque expansas super oblata tenens, dicit:

Hæc ergo dona, quǽsumus,

Spíritus tui rore sanctífica,

iungit manus

et signat semel super panem et calicem simul, dicens:

ut nobis Corpus et + Sanguis fiant

Dómini nostri Iesu Christi.

Iungit manus.

102. In formulis quæ sequuntur, verba Domini proferantur distincte

et aperte, prouti natura eorundem verborum requirit.

Qui cum Passióni voluntárie traderétur,

accipit panem,

eumque parum elevatum super altare tenens, prosequitur:

accépit panem et grátias agens fregit,

dedítque discípulis suis, dicens:

parum se inclinat

Accípite et manducáte ex hoc omnes:

hoc est enim Corpus meum,

quod pro vobis tradétur.

Hostiam consecratam ostendit populo, reponit super patenam,

et genuflexus adorat.

103. Postea prosequitur:

Símili modo, postquam cenátum est,

accipit calicem,

eumque parum elevatum super altare tenens, prosequitur:

accípiens et cálicem

íterum tibi grátias agens dedit discípulis suis, dicens:

parum se inclinat

Accípite et bíbite ex eo omnes:

hic est enim calix Sánguinis mei

novi et ætérni testaménti,

qui pro vobis et pro multis effundétur

in remissión e m peccatórum.

Hoc fácite in meam commemoratiónem.

Calicem ostendit populo, deponit super corporale, et genuflexus adorat.

104. Deinde dicit:

Mystérium fídei.

Et populus prosequitur, acclamans:

Mortem tuam annuntiámus, Dómine,

et tuam resurrectiónem confitémur, donec vénias.

Vel:

Quotiescúmque manducámus panem hunc

et cálicem bíbimus,

mortem tuam annuntiámus, Dómine, donec vénias.

Vel:

Salvátor mundi, salva nos,

qui per crucem et resurrectiónem tuam liberásti nos.

105. Deinde sacerdos, extensis manibus, dicit:

Mémores ígitur mortis et resurrectiónis eius,

tibi, Dómine, panem vitæ

et cálicem salútis offérimus,

grátias agéntes quia nos dignos habuísti

astáre coram te et tibi ministráre.

Et súpplices deprecámur

ut Córporis et Sánguinis Christi partícipes

a Spíritu Sancto congregémur in unum.

Recordáre, Dómine, Ecclésiæ tuæ toto orbe diffúsæ,

ut eam in caritáte perfícias

una cum Papa nostro N. et Epíscopo nostro N. *

et univérso clero.

In Missis pro defunctis addi potest:

Meménto fámuli tui (fámulæ tuæ) N.,

quem (quam) (hódie) ad te ex hoc mundo vocásti.

Concéde, ut, qui (quæ) complantátus (complantáta) fuit

similitúdini mortis Fílii tui,

simul fiat et resurrectiónis ipsíus.

Meménto étiam fratrum nostrórum,

qui in spe resurrectiónis dormiérunt,

omniúmque in tua miseratióne defunctórum,

et eos in lumen vultus tui admítte.

Omnium nostrum, quǽsumus, miserére,

ut cum beáta Dei Genetríce Vírgine María,

beátis Apóstolis et ómnibus Sanctis,

qui tibi a sǽculo placuérunt,

ætérnæ vitæ mereámur esse consórtes,

et te laudémus et glorificémus

iungit manus

per Fílium tuum Iesum Christum.

106. Accipit patenam cum hostia et calicem, et utrumque elevans, dicit:

Tonus simplex in Appendice, p. 1230.

Per ipsum, et cum ipso, et in ipso,

est tibi Deo Patri omnipoténti,

in unitáte Spíritus Sancti,

omnis honor et glória

per ómnia sǽcula sæculórum.

Populus acclamat:

Amen.

Deinde sequitur ritus communionis, p. 597.