Die 11 iunii

S. Barnabæ, apostoli

Memoria

Ant. ad introitum Cf. Act 11, 24

Beátus iste sanctus,

qui annumerári méruit inter Apóstolos:

erat enim vir bonus,

et plenus Spíritu Sancto et fide (T.P. allelúia).

Collecta

Deus, qui beátum Bárnabam,

plenum fide et Spíritu Sancto,

ad géntium conversiónem segregáre præcepísti,

concéde, ut Evangélium Christi, quod strénue prædicávit,

ore et ópere fidéliter nuntiétur.

Per Dóminum.

Super oblata

Obláta múnera, quǽsumus, Dómine,

tua benedictióne sanctífica,

quæ, te donánte, nos flamma tuæ dilectiónis accéndant,

per quam beátus Bárnabas

lumen Evangélii géntibus apportávit.

Per Christum.

Præfatio de Apostolis, pp. 549-550.

Ant. ad communionem Cf. Io 15, 15

Iam non dicam vos servos,

quia servus nescit quid fáciat Dóminus eius.

Vos autem dixi amícos,

quia ómnia quæcúmque audívi a Patre meo,

nota feci vobis (T.P. allelúia).

Post communionem

Ætérnæ pignus vitæ capiéntes,

te, Dómine, humíliter implorámus,

ut, quod pro beáti Bárnabæ apóstoli memória

in imágine gérimus sacraménti,

manifésta perceptióne sumámus.

Per Christum.